Óstán na Mara,
Marbella,
An Spáinn.
14ú Lúnasa

A Liam, a chara,

Bhuel creid nó ná creid táim ag obair anseo in Óstán na Mara i Marbella na Spáinne don samhradh. Is óstán mór galánta é ar imeall na farraige agus tá sé gnóthach ó mhaidin go hoíche le daoine ag teacht agus  ag  imeacht  an t-am ar fad.

Tá m’aintín Nuala ag obair anseo le blianta agus fuair sise an post dom. Nach raibh an t-ádh liom? Bíonn orm bheith i mo dhúiseacht an-luath ar maidin chun cabhrú leo sa chistin ag ullmhú an bhricfeasta. Ní chreidfeá an méid bia a itear anseo gan trácht ar an méid bhruscair a fhágtar ar na boird agus ar an urlár. Ar ndóigh, bíonn orm iad siúd a ghlanadh i ndiaidh na béilithe go léir agus na boird a leagan don chéad bhéile eile. Gan dabht bím ag saothrú go dian gach lá ach tagann a lán daoine cáiliúla isteach anseo. Cúpla lá ó shin tháinig Pierce Brosnan isteach lena bhean chéile nua. Bhí gach duine ag iarraidh radharc a fháil air agus d’fhan sé linn don deireadh seachtaine ar fad. Cheap mé gur fhear an-chineálta a bhí ann.

Faighim cúig euro san uair mar phá agus tá grúpa cailíní agus buachaillí óga eile anseo ag obair don samhradh mar sin bíonn an chraic go maith. Tá buachaill eile ó Éirinn anseo. Dara is ainm dó. Tá sé ag fanacht sa seomra codlata liom agus is cairde buan muid faoin am seo. Ar ár lá saor gach Céadaoin caithimid an lá ag sú na gréine ar an trá agus ag imirt leadóige ar na cúirteanna poiblí anseo i Marbella. Téann na daoine óga eile amach chuig na dioscónna agus na clubanna oíche ach níl mé féin agus Dara aosta go leor le dul amach leo i mbliana.

Ar aon chaoi, conas tá gach duine sa bhaile? An bhfuil Sinéad fós ag siúl amach le Diarmaid? Conas tá do chailín féin? Ar chríochnaigh sí leat go fóillín? Níl mé ach ag magadh, tá súil agam go bhfuil an bheirt agaibh fós i ngrá. Abair haigh léi. Tá mé ag súil le teacht abhaile ag deireadh na míosa agus beidh lá nó dhó againn roimh dhul ar ais ar scoil don chúigiú bliain. Má bhíonn an t-am agat ba bhreá liom litir uait leis an nuacht go léir ó bhaile. Abair le do thuistí go raibh mé ag cur a dtuairisce.

Slán go fóill,
Do chara,
Emmet.